KËNGËT E MALLIT / Cikël poetik nga Hamit Taka

KËNGËT E MALLIT

 

 

 

Hamit Taka

 Cikël poetik nga Hamit Taka

 

 

 

PËRGJËRIMI I NËNËS

 

Ç’më ike, o bir, herët në kurbet

Dhe kokën s’e ktheve më këtu!

Me tinguj malli ende trokasin

Në zemrën tonë hapat e tu!

 

Si e harrove, o xhan, ti shtëpinë!

Si s’të dhimbset më ky vendi yt!

Edhe nusja, që e le pa sqimë,

Këndon çdo ditë një këngë të trishtë!

 

Ajo tani është me atë tjetrin,

E gjora s’na shikon dot në sy,

Po të madh e ka ende respektin

Për babanë, që e sheh me zili!

 

Në breg të lumit shkon ai i shkreti,

Qan atje si foshnjë me lot,

Kujton anijet që nisje drejt detit

Ngarkuar me ëndërra e dëshira plot…

 

 

 

DJALI

 

Oh, puthmë, moj nëna ime,

Në ëndërr dhe në gjumë,

Në gushë e faqe puthja-

Dallgë e bardhë me shkumë;

 

Ke parë, ti, luzma bletësh

Mbledhur degës në pyll,

Ashtu i ndjej unë netësh

Sytë kur i mbyll;

 

Nga shtëpizë e vjetër

Ç’më ngroh ky zjarr i nënës,

Mbi çatinë me rrasa

Përthyhet dritë e hënës,

 

Vjen e zbetë tek unë

Rezja në dritare

“Si, më thotë e prekur,

E harrove nënën fare?”

 

Pranë vatrës nëna

Kruset e mërdhinë.

Ia nis mallin e thekur

Gëzof t’ia vesh shtëpinë;

 

Ah, moj nënë, nënë!

Sa të mbrij atje

Do të ngrej në krahë

Si era grurin ngre!

 

 

 

NËNA

 

Bir, gaz më paç dhe shëndet!

I lumtur qofsh, gëzofsh rini!

Shokë e miq ti paç përrreth!

Mos mbetsh qyqar në vetmi!

 

Po ti na e bëj një zile, o bir,

Të mbushet shtëpia me mallë

Si atëherë kur luga kërciste

Në tasin e mbushur me dhallë!

 

Çoi dhe vajzës të fala, shëndet,

I thuaj një gënjeshtër së largu

Falje i kërko për ato vjet

Kur gjëmonte dashuri te pragu!

 

Si pëllumbeshë hynte e dilte

Dhomat na i mbushte me gëzim,

Flet më fletë flladi frynte

Ilaç më bëhej për shërim!

 

Le të varte kokën babai

Kur e puthje tinëz prapa derës

“Sa i lumtur qe, thotë, qeratai

Sa mirë do ishim ne të tjerët!”

 

Do të mbanim ne nipçet në duar,

Me këngë do na mbushej jeta

Dhe hëna do të dilte e gëzuar

Si lodër do varej mbi plepa!

 

Po, nejse, ti të jesh mirë!

Ruaj shëndetin, bëj kujdes!

Në se një ditë ti vjen me dëshirë

Krahëhapur nëna do të presë!

 

Dhe gjumi atëherë s’do t’më zërë

Gjersa nusja të na kthehet prapë,

Atë tjetrin ajo do ta lërë

Në krahët e tu do hidhet me vrap;

 

Do të jemi, o bir, të lumtur

Familjarisht të gjithë së bashku,

Kur të kalosh me nusen e bukur

Do këndojë e gjëmojë sokaku!

 

 

 

DJALI NUSES

 

Ti thua se të lash, shan dhe mallkon?

Atje rreth teje zemra ruan, vigjilon;

 

Mallin e merr era, përkund arat me grurë

Më sjell këtu aromën e bukëve në furrë;

 

Kur nis e këndoj nga halli jo nga malli

I butë si qerpiku yt rëndon gjumi te balli;

 

Si thëlëzë që fle lëndinës në trifil

Në ëndërr më del vajza mbi gjoksin tënd e shtrirë;

 

Çohem në mëngjes ç’shikoj në pasqyrë?

Krahët e tua fllade drejt qafës sime shtrirë;

 

Gruaja ime e bukur, moj e mira, moj,

Lermë të të themë fjalë të ëmbëla hojë;

 

Deti le të thahet, qielli le të ngrijë

Ti mua pritmë, pritmë se do të vij!

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s