E pamposhtur / Nga Lida Lazaj

E pamposhtur

 

 

lida portret

Nga Lida Lazaj

 

Nuk është e thënë, që po të flesh mbi një petale luleje në maj, do zgjohesh frut i pjekur në tetor. Ngjyra e ftoit në fytyrë, mund të jetë shenjë, se të ka sulmuar një virozë stine, të cilën e mund me një tailolhot e çajra bimore dhe po nuk pate neveri nga vetja edhe ndonjë sugjerim nga zbulimet e fundit të shkecës mjekësore, mund të provosh. Po guxove, ( sipas udhëzimeve jo vetëm grip e rrufë nuk do të qaset, por asnjë sëmundje me emër të lemerishëm, dhe do rrosh një shekull e gjysmë!).Por asnjëherë nuk i dihet. Kjo e verdhë e ftoit të pjekur, si dhe zilka të tjera brenda vetes, të cilat e ke ndarë mendjen të mos i dëgjosh, mund të jenë dhe paralajmërimi i një tjetërsimi fatal. Dhe në të njëjtën orë si sot, nesër je shndëruar në një pirg dheu të freskët, me lule, bukë, verë e vaj sipër, e fëmijët, të pikëlluar e hutuar, pa e kuptuar ende ç`ka ndodhur, të shtrojnë një drekë përshpirtje, ku dashamirësit t`a përtypin emrin së bashku me gjellët e servirura, madje ndoshta dikush t`a ngatërron emrin me cilësimet e gastronomike të kohëvet të fundit. E s`është çudi, ndoshta dikush, që i ka fiksim kortezhet e përmortshme, pas nja dy gotave alkool kërkon edhe njëçikë aheng, se “sikur nuk shkon, krejt pa muzikë”. Çdo gjë mund të ndodhë. Kjo ngjyrë, që të trishton, do të thotë edhe se të përbashkët me gjethet kemi ikjen. Por, ndërsa gjethet, pasi dekompozohen e bëhen ujë e përmes tokës gjejnë rrënjët dhe sërish gjelbërojnë pranverën e ardhshme dhe bëhen diapazon i këngës së bilbilave, unë s`do kem mundësi vjeshtën e ardhshme, madje ndoshta as nesër, për të treguar ca gjëra për gjethet, që vetëm unë i di. Pra çke për të thënë thuaje sot, më thotë ngjyra e ftoit të pjekur në fytyrë. Se them për mburrje, që unë di gjuhën e gjetheve dhe të zogjve, por se kjo që do tregoj ka ndodhur në oborrin, ku fëmijëria ime kish teritorin lojrave dhe ëndërrimeve. Të tjerët dinë çka ndodhur në teritoret e ëndërrave te tyre. Ai oborr tani nuk është më. Nuk janë as mollët, as porta e rrugës, as pragu, as shtëpia, as kopshti i mbjellë me lulepatate, luleshpata që më pikëllonin aq, kur bryma e pabesë e vjeshtës iu këputte gjunjët ende pa vyshkur petalet, dhe selino, që mamaja e përdorte nga pak dhe bënte supën aq të shijshme. Nuk është as ashefi, as vatra, as minderi ku përgjumesha dhe ju përgjërohesha mamasë dhe babit, të cilët donin të më çonin në dhomë, të më linin dhe pak. Do të jepja gjithçka të dremisja mes pëshpërimave të tyre, fëshfërimës së fasuleve që ata zhvoshkinin, zjarrit të vatrës dhe dritës së pakët, që më bëhej sikur dilnin nga kurmet e të dyve. Do të doja të mos mbaronin kurrë ato mbrëmje dhe agshole, kur muret e ashefit përflakeshin, sa dhe mizat zinin një vend dhe shijonin këto çaste. Ah, nuk janë më as ata të dy! Ikën nga kjo jetë si ç`ikin të gjithë. Ndërsa gjithçka tjetër u shit, siç në këtë botë shitet e blihet, gjithçka që preket e shihet. Gjethet mblidhen, ku janë e ku s`janë, gjethe ahu prej korijes, mollësh e kumbullash nga kopshtet e fqinjëve dhe nisin një mision që kanë marrë vetë përsipër. Fillimisht duken sikur ikin kuturu, pa sens, pa lidhje sipas tekave të erës, pastaj mblidhen e bëhen shtjellë pikërisht aty, ku një vjeshtë të largët mamaja, e shtrenjta ime, me një fshesë të bredhtë rrekej ti bënte zap. Ajo se dinte, as unë që shihja e nemitur, përmes dritares nuk e dija, që ato çamarroket i masnin shtatin, i memorizonin format. Ndonëse atje, gjithçka u shemb, u kthye përmbys, u tjetërsua, u thyen plloçat e oborrit,dhe mbi të u hodh pa hesap beton e mermer, çdo vjeshtë aty vijnë gjethet dhe përvijojnë me mijra ngjyra skulpturën e ajërt të nënës sime.
Ja, këtë doja të thoja! Se kushedi iki me gjethet dhe kur të kthehem pas njëmijë vjetësh si kandër mbi gjethen e një lofate, apo si fontanë drite, do kem të tjera privilegje, por jo të fjalëve.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s