Kalendari poetik: Grażyna Miller (1957-2009) / Përgatiti materialin Maksim Rakipaj

Posted on January 29, 2019

0


Grażyna Miller

Kalendari poetik: Grażyna Miller (1957-2009)

Më 29 janar 1957 u lind Grażyna Miller, poete dhe përkthyese polake që jetoi vitet e saj të fundit në Itali. Poetja u vendos në Itali në vitin 1983 dhe filloi të mësonte italisht në Universitetin për të huajt, në Siena. Në janar të vitit 2003 u bë mjaft e njohur në sajë përkthimit në italisht të librit të papës me prejardhje polake, të paharruarit Gjon Pali II, “Triptik Roman (Përsiatje)”. Fituese e mjaft çmimeve në vendin e saj, Itali, Spanjë etj. Ja një poezi prej saj:

KUR PËRSHKRUAN LUFTËN, VDEKJEN

Kur përshkruan luftën, vdekjen
edhe vetë fjalët meken.
Gurgullojnë lotët
nga burimet e shpirtit
dhe ndër humnera të zemrës rrjedhin.
Fërgëllima dhëmbjesh
përshkojnë gjymtyrët,
në ngërdheshje kthehet një buzëqeshje
e jermtë, histori pambarim
e një bote të ndarë.

Kur përshkruan vdekjen, luftën
ulen sytë
mbi fletën e bardhë.
Bombarduar nga mendimet
vdesin fjalët
para syve të njerëzimit.

 

© shqipëroi Maksim Rakipaj

Posted in: AUTORE