Daily Archives: December 8, 2019

Poezi nga Rudina Muharremi Beja

Posted on by

0

Poezi nga Rudina Muharremi Beja

 

Dridhje…

Shkundet dheu,
ekspertët…, kurajshëm numërojnë dhimbjet e mëdha;
Pallate të pabanueshme
Shtëpi të pabanueshme
… zemra të pabanueshme…

 

Çaste…

Në kete botë, erdhëm pa miratim,
por përditë,
autorizoj veten të më dojë,
dhe…, përditë rilind

Tashmë jo më rastësisht…!

 

LOT QIELLI

Ndal hapin,
Muzgut bojëhiri frymën mbajta

Retë vrapojnë drejt maleve,
U thanë lulet, dremitin pellgjet…

Natës, acarit të dimrit,
njerëzit shohin ëndrra hiçi,
mërmërin era hyn zgavër më zgavër,
pallateve shumëkatëshe të krisura…

U trembën fëmijët,
gjumit të bardhë përkundur djepit.
U trembën zogjtë,
degës së plepit braktisën strehët

Pikëllimi beftë rrethon tokën
e qielli i lodhur në lotë shkrehet …

 

SIZIF IN LOVE
 
Ndonjëherë, mungon aq shumë sa më s’ marrë frymë,
lëshoj një piskamë në terr…
mëngjesit, mbështillem me diell.
 
Bie në krahët e një kënge,
tek përpiqem të shpëtoj,
dal prej ëndrre…
 
Trok i drunjtë dhjatës së vjetër
Strukem, shurdhmemecëve muzgje,
bëj të zhdukem nga mendimet e tua,
gulçoj frymës së dallgëve….
 
Por nuk ka vend aq të largët,
kudo shkoj, zemra ime do më ndjekë.
Dhe ti me të …!

Ftesë për pjesmarrje në Manifestimit poetik “Ibrahim Rugova”, edicioni i II-të

Posted on by

0

Ftesë për pjesmarrje në Manifestimit poetik “Ibrahim Rugova”, edicioni i II-të

Të nderuar poetë dhe miqë të poezisë nga e gjithë gjeografia shqiptare

Me rastin e përvjetorit të shkuarjes në amshim të Presidentit Historik të Kosovës, Dr. Rugova, Forumi i Rinisë i subjektit të parë antikomunist shqiptar, ka bërë të gjitha përgaditjet për mbajtjen e manifestimit poetik “Ibrahim Rugova”, edicioni i II-të.

Pas suksesit nga edicioni i I-rë me pjesëmarrjen e mbi 75 poetëve nga e gjithë gjeografia shqiptare, poetë të cilit me poezitë e tyre kanë përshkruar në mënyrë unike veprimtarinë dhe rolin e Presidentit ndër vite dhe ku çmimi kryesor i manifestimit i është kushtuar mikut të Presidentit, zëdhënësit të lirisë “Xhemajl Mustafa”, kësaj radhe, në edicionin e II-të, përveq të tjerave, çmimi i manifestimit do t’i kushtohet njërës nga ëmblemat e vlerësimit dhe respektimit të pakompromis të Institucionit të Presidentit, figurës ëmblematike, i dekoruari me “Medalje të Artë të Nënë Terezës” nga Ibrahim Rugova, “Heroi i Kosovës” nga President Sejdiu dhe “Nderi i Kombit” nga Presidenti i Shqipërisë z. Nishani, pra çmimi kryesor i manifestimit poetik do t’i kushtohet: Kolonel Tahir Zemaj.

Në edicionet e ardhshme, çmimet do t’i kushtohen figurave të tjera ëmblematike që kanë kontribuar ndër vite në Lidhjen Tonë dhe duke qëndru besnik ndaj vijës presidenciale të Arkitektit të Pavarësisë; Dr. Ibrahim Rugovës, figura të dëshmuara siç mund të jenë; Prof. Fehmi Agani, Enver Maloku, Smajl Hajdari, e kështu me radhë, duke nënvizuar rëndësinë dhe rolin e personaliteteve të tilla që sot fizikisht nuk gjenden në mesin tonë por puna e tyre e dikurshme, pikërisht në kohëra të vështira që po kalonte atdheu, ishte hallkë e fortë për ditët e lirisë të cilat jemi duke i jetuar.

Duke nderuar pjesëmarrjen e dashamirëve të fjalës së bukur artistike, nga e gjithë gjeografia shqiptare, kemi bërë të gjitha përgaditjet serioze që manifestimi poetik, edicioni i dytë të mbahet dhe të jetë sa më meritor, për hir dhe në nder të përkushtimit të Presidentit dhe miqve të tij për liri dhe pavarësi.

Pra; ftoheni të konkuroni në konkursin ndërkombëtar kushtuar Presidentit të I-rë të Kosovës; Dr. Ibrahim Rugova.

P.S.

E vetmja formë dhe mënyrë e komunikimit dhe shpjegimit për gjithçka që ndërlidhet me manifestimin poetik “Ibrahim Rugova”, edicioni i II-të, mund të bëhet përmes E-mailës në konkursin poetik ndërkombëtar.

Mirëutakofshim

Data: 18 janar 2020
Ora: 13:00
Vendi: Prizren

 

Poezi nga Suzana Malaj

Posted on by

0

Poezi nga Suzana Malaj

 

Denoncim

Tensionimi i nofullave
i tronditi eshtrat e palëvizshme të kokës,
i drodhi!
Ashtin ballor e lëkundi me 6 gradë!
Ashtin muror e shkundi!
Pasiguri e madhe në ashtin tëmthor,
në lodrën e veshit…
Dëgjohen kërrcitje në murin e mesëm,
në dy zbrazëtirat e syve…
Ka diçka që nuk shkon me rrëshqitjet,
ka diçka që nuk shkon!
Nofulla e poshtme që është e lëvizshme
vazhdon shtrëngimin si darë…
Sa shtrëngim barbar!
Denoncoj eshtrat si bigë të fytyrës
në krahun e majtë e të djathtë
hap dosjet…
e shpall gjendjen e jashtëzakonshme!
Ashti i lotit shpërthen erozionit
në ashtin e mollëzave!
Lidhja e fortë suture e eshtrave të kokës
shpërbëhet në dridhje 8 – ballë!
Nuk jam mirë por muskujt e gjuhës
janë tharë deri në rrënjë,
kocka e epiglotit ka pësuar krisje…
Ky pragdimër po i jep shenjat në kokë
e po më çmend!
A mund të çlirohem nga nofullat?!

 

Bebëzat e syve

Bebëzat e syve u zmadhuan
sikur donin ta pinin dritën
në formën e kupës së hyut!
Sa të bukura bebëzat!
Gati shpërthejnë perimetrin e syrit
alfabetit me sensorë të përndezur!
Të zhveshura mendimet – rreziku i zjarrit
cënon territoret e kokës…
Ndërgjegjia manipulohet me barrierat e shikimit në sy
tkurren bebëzat duke thyer kupën e hyut!
Foton për foton kontrollohet drita
e sytë bëjnë dërgesën e parë në tru
nga vendet e klasit të parë…
Më pas dërgesa e dytë
dhe e treta dërgesë
përcaktojnë marzhin e gabimit…
Qajnë sytë…
Sa të bukura bebëzat !

 

E pamundur

E pamundur të ekzistojë një vullnet i vetëm
ka të paktën dy vullnete që censurojnë njëri – tjetrin
brenda një koke…
Kanë ndarë hemisferat – ndërsa unë orvatem
për të vepruar tri blloqe më tutje
aty ku gjendet “Pika e Zotit”!
“Busulla” prapa veshit më kërkon letrat
ndërsa anashkaloj fjalët e gjysmës së rruzullit
për të kaluar në gjysmën tjetër…
Brenda dy gjysmave
ka një lloj censurimi që m’i gozhdon shqisat
e më bën gjimnastikën e muskujve!
Të paktën kështu më duket
s’po e gjej formën e një vullneti të vetëm
në trajtën e plotë të rruzullit
Çudi dhe globi ka një lloj censurimi
mes Perëndimit e Lindjes
Kërkesa legjitime e një vullneti të vetëm
është kaq i pamundur
sa brenda globit – zonat e minuara
hidhen në erë brenda kokës!