Nuk dua …. / Poezi nga Leonard Bixhilli

Posted on January 26, 2020

0


Poezi nga Leonard Bixhilli

 

Nuk dua ….

Nuk i dua ditët me reshje dhe vranësira,
nuk dua netët e dimrit vetëm t’i shkoj,
nuk dua njerëz në biruca lidhur me zinxhira,
nuk dua i rrethuar nga armiq të jetoj.

Nuk e dua detin gjithmon të jetë bunacë,
nuk dua vila me pishina e salltanete,
nuk dua të rinj të papunë të shoh në pjacë,
nuk dua servilët t’më tërheqin prej xhakete.

Nuk dua që puntorët si skllevër të trajtohen,
nuk dua që shkollat të ruhen me policë,
nuk dua politikanët për idetë të internohen,
nuk dua vendi të qeveriset nga një pakicë.

Nuk i dua këngët që me tekstin nuk përputhen,
nuk e dua miqësinë me interesa,
nuk i dua çiftet që vend e pa vend qëndrojn’ e puthen,
nuk i dua rrugët me gropa dhe me kthesa.

Nuk dua qiellin të ma pushtojnë antenat,
nuk i dua stadiumet bosh, pa spektatorë,
nuk dua të rinjtë të helmojnë me drogë damaret dhe venat,
nuk dua të shkojë dimri pa të ftohtë e dëborë.

Nuk dua të shohë prindër dhe fëmijë të braktisur,
nuk dua dipllomën e jetës ta marr me notë kaluese pesën,
nuk dua të mbajë armë një kokëkrisur,
nuk i dua qeveritë që më vrasin shpresën.

Posted in: POEZI