Kleopatra ime / Poezi nga Sadik Bejko

 
 
Poezi nga Sadik Bejko
 
 
 
Kleopatra ime
 
Pushteti, shkretëtira, dashuria të jesh …
Ndokur dje, sot apo nesër
vetë Kleopatra e Egjiptit,
mjalti e kobra të jesh … fshehur
nën dy thimtha gjarpri a gjethe fiku.
 
Dhe qumështi thellë nën shegët e cicave
në dy thimtha kobre ngulur a nën dy sumbullza gjiri…
 
Mëngjese aleksandrine nën vesk të ndritur asgjësimi,
Vesk prej drite, helmi dhe zvetënimi ëmbël të ftohtë.
Kobra më je ti, zemra ime, kobra e zezë rrëzëllitëse,
E gjerdantë, vizëlluese, vegimthi e thiktë e fildishtë.
 
Kobra mbi piramidë në shkitën e shkretëtirës,
I fshiktë vezullim fildishi
qilim rëre pa ajër, pa qiell, qilim asgjësimi,
kobër, më je ti zemra ime…. Mjalti dhe kobra je.
 
S’më do.
S’mund t’më duash mua Qezarin a Mark Antonin.
Fëmijë e shkretëtirës, ti shkretëtirën do
Dhe fëmijët e tu me skeptra mbretërimi,
Qezarioni, më i bukuri, gjak romaku, bir Qezari,
Fatal me rrënjët nëpër kobra rëre firaksur.
 
Kobra, ti zemra ime e vezullimtë, vjen ora,
Vjen ora e do të vdesësh
pik rëra, pik toka, pik ajri në kombe helmi,
gjarpër këputur në litar të hollë rëre
mirazhi im në tru të vogël kobre
mirazh kobre në trurin tim të vogël,
muzg rënë pa gojë drite, pa firomë gjethi…
 
Do të vdesësh Kleopatra ime … vjen ora..
në pus, në shtëmbë të mishtë dheu a njeriu,
nuk ngjallet më fryma… medet, do t’më vdesësh,
bijë Mesdheu syftohtë, (jo Athina syullinjtë)
në pak rërë, në pak ajër, në pak gjurmë gjarpri
në pak qiell helmi, nën kokërr fiku ëmbël e kyçur…
 
Rrotulla e bishtit të kobrës vërtitet
Trand, shkund në të dy anët brigjet e Mesdheut
vorbulla e rërës të thith ty dhe kobrat
thellë, thellë iu thëthijnë sa të prekni shkëmbin nën shkretëtirë.
 
Kobra me je ti zemra ime,
femra ime,
mbretereshe,
Kleopatra ime

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s