Poezi nga Behare Daja Kasa

 
Poezi nga Behare Daja Kasa
 
 
kohë e trishtë
 
këto ditë të ftofta,
një mysafir i paftuar
më viziton shpesh.
më hedh ca ethe,
ca zjarrmi
e endet kuturu
mbi kryet e mi.
me termometer në dorë
vjen kohë e pa kohë,
e shiun e etheve
e hedh si flokë bore.
 
kho-kho,
veç kollitje,
zjarrmi dhe jerm
sheh në sytë e tij.
 
vegimet e verdha
enden në sy,
mendje,
e prapë kthehen mbrapsht
e ngecin në fyt
si kafshatë që s’kapërdihet.
 
ujë…
– këlthas mes jermit.
një dorë mbi krye
më përmend…
…është dora jote…
 
ej, ti qershiza ime…
…me gjethe të gjelbra
e lule flokëbardha
që bleron pranverë më pranverë
e vjeshton vjeshtë më vjeshtë,
a s’më fal pak ëmbëlsi e buzëqeshje
nga kokërrzat e tua mishtake?
 
stinët e shpirtit e duan të kuqen tënde.
 
atje lart mbi degëza,
tek ma bën me sy,
më ndjell të të prek
e të të kafshoj
e të futem në mëkat
me kokërrzat e tua
të kuqe si flakë
e të ëmbla si mjaltë…
e pa fund të mëkatoj.
 
…zot mbama dorën
e mos më bëj pre të mëkatit të bardhë…
 
 
përgjumje
 
nuk lodhem
të të bëj për vete,
nuk mundohem.
 
unë të largoj,
ti më afrohesh,
më zgjat dorën,
më puth
e më ledhaton
me gishtërinjtë e shpirtit.
 
drithërimë këto duar,
ma mpijnë kurmin.
 
rrekem të iki,
por ti më ndjell,
më tërheq
e në thelb të zemrës
më bën vend.
 
…është ngrohtë atje…përgjumem…
 
 
Endje mes kohërave të trishta
 
Çdo ditë e më tepër endemi kohërave të trishta,
Ku ditët mezi tërheqin vetveten këmbëzvarrë,
Ku stinët ka kohë, që nuk ecin me ritmin e tyre,
Ku vjeshta e artë, kthehet në dimër të acartë.
 
Çdo ditë e më tepër endemi kohërave të trishta,
E mëngjeseve zgjohemi me ndjenjën e trishtimit në sy,
Ku vështrimet na ngrijnë në shtylla neonesh të mpita,
Atje ku lajmërimet e reja shtohen e shtohen pa mëshirë.
 
Kohërave të trishta endemi më tepër çdo ditë,
E me lot në sy, shohim tek na ikin të dashurit.
Mpaken shpirtrat, treten e bëhen hi,
E dhimbja kërruset nga pesha e lotit të vakët.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s