Poezi nga Mihal Gjergji

 
Poezi nga Mihal Gjergji
 
 
MUZGU NË TEPELENË
 
Fanota e rrënuar del nga terri
Dhe zgjohet ndryshe, bëhet Tepelenë
Karvane s’ka. S’dëgjohen klithma tmerri
Një tufë kaçakësh bëjnë sikur flejnë
 
Atje, ndanë udhe muzgu shtron jatakun
Unë rri si murg, me erën them dy fjalë
Një re e zezë ja fsheh kufirit gjakun
Po dita gdhinë e gjaku prap do dalë
 
Kjo hënë e ngrënë, s’di ç’kërkon në varre
Nxjerr syrin si kusare, në një breg
Të vdekurit janë futur mes të gjallëve
Një italian qafohet me një grek
 
Shikoj një xhind, një tjetër rend kaluar
Këmbejnë udhët, marrin arratinë
Ca veteranë, në strehën e harruar
Mbi plagë të luftës lidhin fort lavdinë
 
Litar i fjalëve zgjatet tejendanë
Pazare tokash, postesh, mbretërish
Të gjithë i bien gjoksit si kambanë
E duan qesen, ndryshe s’mund të rrish
 
Një kishë-fantazmë, një shekull rri në pritje
Temjan e kryq e Krisht i mban në gji
Një makth i largët zbret e bën dremitje
Mos pret të kthehet zonja Shën Mari?
 
As Shën Vasiliqia s’paska shkuar
Dhe Hanko Zonja tjetër dhimbje ka
Aliu rend me kokë të prerë në duar
Mëngjezin tjetër zgjohet prapë Pasha
 
Një ulërimë Hormove ndjen te veshi
I bëhet shall rreth gushës, s’di përse
Rënkon Kardhiqi, mbytet nga rrebeshi
Një mushkë të kuqe nis në Valare
 
Bajroni më shkel syrin. Hap një derë
E pret Veziri, në prehër perëndish
Të huajt i nderojmë mbi të tjerë
Dhe njeri-tjetrin vrasim pabesisht
 
Martirët bëjnë roje istikamit
Ja një hero, i heshtur si asket
Dikush ka vjedhur gunën e Selamit
Dhe qënka ngjitur lart në Parlament
 
Një bujurdi nga larg ma sjell Valiu
Në dy gish letër fjalët si farmak
Dhe Demir Hani, thonë se kështu ngriu
Në lutje e dha shpirtin pak nga pak
 
-Qytet fantazmë, mallkuar kush të ngriti
Mos e bëfsh qindin..! U shua, ra në gju
Nuk di, nga cili fron rrufeja zbriti
Dhe vetë mëshira lyp mëshirë këtu!
 
Në vend të gjirit Vjosën pi Hamleti
Se ndryshe s’bëhesh dot, as princ as mbret
-Unë mbaj në shpinë një barrë të rëndë shteti
Dhe nuk kam kohë të flas me një poet!
 
Tiran ndaj vetes time bëhem prapë
Për gjakun që kam derdhur s’thanë asgjë
Po dhe i vdekur fjalën s’mund t’ua jap
Për tjetër perëndi e kam atë!
 
 
 
DJEMTË E GUSMARIT
Baladë
 
Shtatë yj’ ka plejada
në mitologji,
shtatë djem balada
që po thur tani.
 
Shtatë bij të rënë
fshati im Gusmar,
në shtatë zemra nëne
të shtatë kanë një varr.
 
Të shtatë plejadat,
yje plot ndriçim,
u tregojnë detarëve
udhën në lundrim.
 
Ashtu dhe të shtatë
djemtë në Gusmar,
si te kjo baladë
ndrijnë si pishtar.
 
Në shtatë burime
zbret sorkadhja pi,
në shtatë ligjërime
një bilbil mban zi.
 
Ç’ëndërr sheh Tafili,
ç’gjumë bën Samiu?
Një bisk trëndafili
mes dy kurmesh mbiu.
 
Dhe mban gjyshja plakë
dy foto në gji,
dy djem, dy zambakë
në një elegji.
 
Kur nis e çel molla
shoh Çobon jetim,
vjen e pyet te shkolla:
Ku është emri im?
 
Ç’i sëmbon në zemër,
vallë ç’brengë e ha?
Shkollës i dhashë emër
nxënës pse nuk ka?
 
Vrarë në Tiranë
ngjallur në Gusmar:
Varrin tim me vete
si një djep e marr.
 
Pranë i vjen Ziguri,
jetim edhe ky,
flet me fjalë burri:
Hajd’, mësojmë të dy!
 
E thërras Muratin
mbi kala, atje…
Mbushur plumba shtatin
vjen Gusmarin sheh.
 
Hënën hedh mbi supe
plagën lan te kroi,
pas një zilke mushke
erdh’ Et’hemi e shkoi.
 
Jelek të qëndisur
sahat me flori,
me shark të kastisur
del nga vdekja e tij.
 
Iu tret dhëndëria
nëpër vargje kënge,
thinjet nusëria
si një brengë nëne.
 
Shkoi dhe erdhi e ndali
mes shokëve të tij,
sikur zbret nga kali
Kostandini i ri.
 
Dhe u mblodhë të shtatë
djemtë në Gusmar,
si te kjo baladë
thurur varr më varr.
 
Shtatë varre njom vesa,
shtatë fate gremis,
shtatë shamizeza
në shtatë udhë i nis.
 
Shtatë qyqe vajtojnë,
shtatë djemtë varr më varr,
shtatë kroje shterojnë
rrotull në Gusmar.
 
Samiu dhe Tafili,
Çobo dhe Murat,
nën rrënjë trëndafili
zgjohen, hedhin shtat.
 
Pasho lis me fletë,
Et’hem dhe Zigur,
të shtatëve përjetë
varri u digjet nur.
 
Nga ky nur balada
merr kuptim të ri,
si në shtatë plejada
në mitologji.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s