Sot, më 10 qershor, mbush 54 vjeç Gemma Gorga i López, poete dhe profesore universiteti. Studioi filologji spanjolle në universitetin e Barcelonës, ku mori doktoraturën dhe vazhdon të punojë po atje. Është specializuar për letërsinë e Mesjetës, të Rilindjes dhe atë barok. Ka botuar disa përmbledhje poetike, ja një poezi prej poetes katalanase:

 

 

 

Prej dritares një sy hedh nga sheshi: te rrapi

katër gjethe të lodhura kanë mbetur

që s’kanë vendosur fluturimin

e fundit të marrin. Katër janë

edhe ditët që lëkunden në kalendar,

gati për të rënë kur nuk i sheh kush.

 

Gjithçka kështu merr fund, duke u shkëputur

e duke rënë përdhé

me erën e ftohtë të kësaj

stine të vështirë. Procesi është i ngadalshëm,

gati s’vihet re. Vetëm po ndënje netë të tëra

të mësosh sytë me qetësinë

para se ta ndjesh si jeta gjethet humb,

humb ditët, oksigjenin humb, zogjtë humb,

trupat humb, humbasin edhe përgjigjet.

Festojnë edhe të vdekurit Krishtlindjet,

përqark lodrave ulur. Mbështetur në dritare

edhe për ta mendoj, është një mënyrë të mendoj për vete.

 

Dhe jeta gjethe humb, mospërfillëse

ndaj gjithçkaje, si një pemë e madhe që i bien gjethet.