Poezi nga Ilirian Zhupa

 
Poezi nga Ilirian Zhupa
 
 
GJUHË SHQIPE
 
A-ja këmbëhapur
Me stekën midis,
B-ja dy gjinj
Ku njeri ka risk.
 
C-ja si hëna
E gërryer krejt,
Ç-ja bishtdredhur
Që çirret për qejf.
 
D-ja si bota
Në luftën e ftohtë,
Dh-ja dy dhimbje
Që s’lindin dot.
 
E-ja një krehër
Që vihet mbi flokë,
Ë-ja dy pika
Që bien si lotë.
 
F-ja si flaka
Diç digjet në të,
G-ja si gratë
Kur plaken tashmë.
 
Gj-ja është pema
Që do të hedhë rrënjë,
H-ja është dera
E zënë me llëngë.
 
I-ja shigjetë
Pa tel e pa hark,
J-ja jetimi
Që shtrihet pa darkë.
 
K-ja me krahun
Dhe këmbën në erë,
L-ja në gjunjë
Për seks e karrierë.
 
Ll-ja dy njerëz
Që bëjnë e s’bëjnë një,
M-ja shilarës,
Të tundesh mbi të.
 
N-ja një shkallë
Të ngjitesh më lart,
Nj-ja është maja
Me litarin si lak.
 
O-ja një zero
Plot tingëllimë,
P-ja i gjalli
Me barrën mbi shpinë.
 
Q-ja me bishtin
Pak brenda, pak jashtë,
R-ja si shpresa
Që ka pritur gjatë.
 
Rr-ja rrënkimi
Për ç’lemë nga mbrapa,
S-ja lakimi
Për punët e mbrapshta.
 
Sh-ja si shefi,
Që vdes për karrige,
T-ja Tantali
Me rrasën mbi krye.
 
Th-ja thëllimi
Në zgjim e në gjumë,
U-ja rrënkimi
Që njohëm më shumë.
 
V-ja përpjekja
Për ëndrrën dhe shpresën,
X-ja është kryqi
Që pret sa të vdesim.
 
Xh-ja xhelati
Me hark e shigjetë,
Y-ja ylberi
Që deshëm në jetë.
 
Z-ja përpjekja,
Që vdes kot më kot,
Zh-ja vetë qenia
Me thikën në gjoks.
 
 
SY TË KËQINJ
 
Më heton së tejmi, me qetësi të egër një sy i akullt,
Largohem t’i fshihem mes shkurreve të dendura, humnerave.
Ma përgjak fjalën, ma trishton ndjenjën, m’i këput krahët,
Më rreh me fshikujt e erërave.
 
Më rri përbri, ngrihet përmbi, bën dritë të keqe,
Kërkoj syrin tjetër, mos kushedi është më i ngrohtë,
E gjej si ngre gracka, çarqe, kurthe e leqe,
Të më rrëzojë në tokë.
 
E lakuriqtë qenka bota! Të fshehtat e saj qenkan profka,
I vetmi mister qenkam unë, plot me guva e pyje,
Flakur në këtë breg të ftohtë nga dallga e shqota,
Dënuar të copëtohem nga thikat e syve.
 
 
 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s