ATDHEUT / Poezi nga Mimoza Çekiçi Rista

 
Poezi nga Mimoza Çekiçi Rista
 
 
 
ATDHEUT
 
Ku ta gjej një këngë
një varg poezie
dheu im i rëndë
bërë prej dashurie.
 
Dy mijë yje ndrijnë
shuhen dymijë yje,
por ndriçimi yt
është gjithmonë në krye.
 
Më ndriçon gjithë shtigjet
netëve pa hënë
pyetjeve, përgjigjen
veç ti ju ke dhënë.
 
Dheu im i rëndë,
që s’je veç prej dheu
brenda meje rrënjë
mbeshtet si Anteu.
 
Unë një copë thërmije
ngjasoj para teje,
por dhjetë oqeane
më rrjedhin ndër deje.
 
Të dua të them,
ndonse është shumë pak,
pa ty jam si zemra
që vdes kur s’ka gjak.