KODI I MALLIT (Në vend të recensionit për vëllimin poetik “Udhë lumnie”i autores Sadbere Gagica Spahija, publikim i Shtëpisë Botuese ATUNIS) / Nga: Prend Buzhala

KODI I MALLIT (Në vend të recensionit për vëllimin poetik “Udhë lumnie “i autores Sadbere Gagica Spahija, publikim i Shtëpisë Botuese ATUNIS) Nga: Prend Buzhala Poetja i ka betejat e saj të shpirtit. Shpesh shpirti është ajo hapësirë e qenies, … Continue reading

Cikël poetik nga Lumo Kolleshi

Cikël poetik nga Lumo Kolleshi

 

NËNA

Nëna ende nuk e ka marrë vesh që dy lisat s’janë më,
Që nuk duhen as fshesat me xanë për avllinë në vjeshtë,
Për murin e rëzuar të odës prapë nuk di gjë,
Nuk di që larg e larg i shkuan të gjithë djemtë.
Bashkë me vjeshtën u bë gjethe dhe vetë,
Nuk pati një pranverë prapë për të.
Në të gjithë tetorët syri më përzihet me retë,
Në të gjithë tetorët reumatizma dhimbjen time zë.

 

VJESHTË

Nuk ka si të ndodhë ndryshe,
ndryshe vet ari nëpër fletë do të ndihej ngushtë,
Vjeshta vërtet përcjell dallëndyshe,
por butet i rëndon të gjitha me musht.

Omar Kahajamin e lashtë
e ringjall përherë nga varri.
Le të dehet poezia, të bëhet tapë,
kur peisazhet vishen me këmisha ari.

 

***

Të mjerëve zhanvalzhanë u dridhen leqet
E ju më thoni që s’ paska drejtësi.
Mafia feston në banka e pret çeqet,
në shtëpinë e shpresës ka rënë zi.

 

MUZG NË QIELL

Për një çast,
Draprin dhëmbëngrënë të kësaj hëne,
Do ta flakja poshtë,të humbiste në valët e detit,
Për inat të yjeve,
Që ende nuk po hidhnin farë brazdave të qiellit.

 

BREGU DALMAT

Një diell që ikën tej perëndimit,
Një qiell me ca re të përflakura,
Që hirin e tyre mistershëm do ta shkundë kushediseku
Dhe sytë e mi kërkimtarë nëpër muzg,
Futur thellë një palimpsesti të lashtë
Për të veçuar tokën nga deti.
Një det që kërkon të hyjë në zemër të tokës,
Toka vet zgjat kthetrat tutje në kaltërsi,
Imazhe që ndërrojnë vendin papritur jeshil-blu.

 

DITË SHENJTËRIMI

Shqip flitet sot në Vatikan,
Në Romë sot këndohet shqip,
Unë sot një bast me qiellin kam
Në këtë udhëtim që dhe biletën e gjeta fare rastësisht.
Nuk di pse kam një mëri me pilotin në kabinë,
Kërkoj vetëm shpejtësinë e dritës,
Të gjendem sa më parë në aeroportin e vendit tim,
Kohës t’ia korrigjoj një gabim.
Nga sot e nëpër breza
Ajo është Santa Tereza.