Poezi nga Natasha Xhelili

 

natasha Xhelili

 

        Poezi nga Natasha Xhelili

 

 

 

PEISAZH DIMRI

 

Peisazhin e fundit të dimrit

Në shilarëse të zemrës

Përkund ,

Pemët e zhveshura nga mungesa

Drithërohen në petalet e dëborës,

Shiu i rebeluar ëndrrave

troket me forcë

Në dritaren time,

Ritmi i tij si shuplakë

Godet  vetminë.

Krahët e shtegtimit treten

Horizontit të afërt.

Re, mjegull, errësirë,

Më ngrijnë në sfond.

Kam shumë ftohtë

Mes  kësaj boshësie të bardhë

Krahët e ëngjëllit të dashurisë

Nuk përkulen më mbi mua…

Vajtoj si fëmijë mbi letrat e djegura

Në hirin e tyre ringrihen fjalë,

Fjalë të ndrojtura, të mbetura pa fole…

Në frymëmarrje stuhish

Si endacak vrapon në kujtimet e mia,

Duke i rënë po asaj melodie,

Duke pritur lëmoshë përkëdhelëse…

Peisazhin e fundit të dimrit

Skalis në murana dhimbjeje

Krojeve ndihet avulli I lëvizjes

Lumenjtë vërshojnë si hiena

Gërvishtin gjithcka

Me thonj gjakatar…

Dielli i mekur

Regëtin si dritë xixëllonje…

Ti hap derën e kujtimeve

Në peisazhin e endur

Në pëlhurë ,më tërheq prej sfondit,

Më shkul zemërimin e mbramë…

Atje, në pikturën e modeluar me trishtim,

Ka një njollë të bardhë,

Një vend bosh

Që duhet ta mbush me pritje…

 

 

 

DHURATA

 

Si lirë më belbëzon në vesh

Një diell i lindur

Në zemrën e dashurisë.

Në petale ylberi

Ditët mbartin stinët

si jehonë prag stuhisë.

Në ngrohtësinë e duarve

Si drenusha rendin

Rite pambarim,

Në altarin e puthjes

Valëvitje flakësh

Përshëndesin si agim.

Në largësinë që s’mbaron

Ndriçojnë rrugën

fjalë në vetmi,

në kurora dafinash

end pëlhurën e pritjes

me premtimin e tij.

Në balada rinjohjesh

Prej botësh të ndryshme

Nishanet zgjatin kokën,

Krushqit duarbosh

Në kuaj ngarkojnë

Betejën me kohën.

Si endacak unë lyp

Brigjeve të shpresës

Orakuj të shkelur,

Në ëndrra takimi

Më sill si dhuratë

Veç një të përkëdhelur…

 

 

 

PËRKUNDEM

 

Preludin e lashtë të agimit

E ngarkova në krahët e erës

Diellin e zbehtë të trishtimit

Në pragun e plazhtë të verës.

 

Vrapimin prehës të ajrit

Zbrita mbi pranverën e fjetur

Ndriçimin sundues të farit

Mbi zërin dhe klithmën e etur.

 

Hijen që s’lodhet pas meje

Si relike ruaj në xhep

Pirate e fshehur në deje

Harta thesaresh më jep.

 

Po ndihem vetëm , e humbur,

Me flatrat e prerë të zanës,

Porta e gëzimit është mbyllur

Në frikën e drapërt të hënës.

 

Përkundem në valën e kohës

Duke zgjedhur ëndërr a djall,

Heq perden e zymtë të botës

Kur dritë-errësira më kall.

 

 

 

HONEVE TË TUA

 

Derdhem honeve të tua,

porsi verë në një gotë,

vera shkumëzon bekuar,

unë, e lëngshme kristal-lot.

 

Si një shtjellë, marr me vete

kujtime vello shtrëngate,

nëpër shtigje hojezemre

njëjtësia e një nate.

 

Derdhem pranverë prag verës,

si një zjarr që shkon në maj(ë),

tretem  në spektrin e vesës,

humbas nektarit të saj.

 

Shpinëkthyer përëndimit,

si hero pas një beteje,

harruar skenaflijimit,

perëndishëm vjen drejt meje.

 

Flakur trupin tim në zhgjëndërr,

dejet mbush imazhi yt,

honet si lastarë më bëhen,

mishërimi po më mbyt.

 

Prapë prej mishi e prej kocke,

gjunjëzoj të njëjtin mbret,

pa fanfara, tinguj lodre

që nga honi më nxjerr vetë.

 

Sy më sy shpirtpërvëluar,

valëzohemi mbi shtrat,

rilindur në ato duar,

Beatris në qiell të shtatë.

 

 

 

HARRESË

 

Tani që perdja e trishtimit

Më ka pushtuar,ëndrrat flak

Dhe eci rrugëve të harrimit

Mallin tënd shëroj si plagë.

 

Po zgjatin kokën ndarjesitë

Portretin tënd kafshojnë nga pak

E mbetur vetëm yjësitë

M’përplasin hijesh buzëzambak.

 

Po sjell në mend fjalë, shkronja,

Fshehur shtigjesh ,larë me lotë,

Do mundem vallë unë e gjora,

Të rroj pa diell në horizont?

 

Errësira vdekjen plak

Si shtrigë Salemi bën magji

Një brengë e mbetur zemrës çark

Me etje fshin çdo gjurmë të Tij…

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s