U lind më 15 prill 1931 Tomas Tranströmer, ishte shkrimtar, poet dhe përkthyes suedez, shumë i nderuar në vendin e tij, fitues i çmimit të Këshillit Nordik për Letërsinë në vitin 1990, fitues në Mbrëmjet Poetike të Strugës (si Neruda, Edoardo Sanguineti dhe Eugenio Montale) etj., dhe fitues i çmimit Nobel për letërsi në vitin 2011. Ja përzgjedhja ime sot:

 

 

 

Syri i qiklopit të plotfuqishëm mjegullohet

dhe bari struket e dridhet nën pluhurin e qymyrit.

 

Të nxirë dhe të mavijosur nga ëndrrat e natës

hipim në trenin

që ndalon dhe ngroh vezët

në çdo stacion.

 

Mezi dëgjohet tingëllimi i kovave të këmbanave të kishës

duke marrë ujë.

Dhe kolla kryeneçe e dikujt

sikur qorton të gjithë dhe gjithçka.

 

Një idhull i gurtë lëviz buzët:

është qyteti.

I sunduar nga keqkuptime të forta

mes atyre që mbajnë radhën te kasapët

mekanikë, oficerë detarë

keqkuptime të forta, akademike!

 

Sa më dhëmbin sytë!

Lexojnë nën dritën e zbehtë

të llampave që ndriçojnë si xixëllonjat.

 

Nëntori dhuron karamele graniti.

E paparishikueshme!

Si historia e botës që gajaset në vendin e gabuar.

 

Por ne mbajmë vesh zhurmën

e kovave të këmbanave të kishës që mbushin ujë

çdo të mërkurë

-vërtet është e mërkurë?-

edhe kaq është tepër për të dielat tona!