Epigrame  nga Iliaz Bobaj

 

 

 PRONARËT

 

Një jetë me punë djersëlarë,

pronë, i ati, kish një kalë.

Në pak vite tranzicioni,

i biri, pronar avioni.

 

 

 KËMBORA E UNIT

 

Për ta bërë veten pakëz më të rëndë,

varim në qafën,

tonë këmborën e unit.

Dhe e tundim, e tundim, e tundim…

 

 

MIKU I RREMË

 

Po pate një mik të rremë,

është njëlloj,

si të kesh një monedhë të rreme në xhep.

Pa pikë mëshire flake tej,

ta ndjesh veten të lirë, të qetë.

 

 

LAJKA

 

Në pamje lule e bukur,

po helm i pikojnë fletët.

Lajkën e falin dinakët,

e pranojnë mendjelehtët.

 

 

CILËSIA

 

Shportës së mbushur me perime,

t’ia ngresh cilësinë, e ke vetë në dorë,

kur i heq një kungull, të vend të tij,

vendos, të paktën një sallator.

 

 

VLERA

 

Për t’i vënë notën njeriut,

s’është nevoja për përralla,

se sa di, e tregon puna,

sa nuk di, e tregon fjala.