Poezi nga Gerta Bandilli
GRATË E LUFTËS
Buka u gatua e trëndafiltë
në agim
pasi gratë u shenjtëruan
prej seksit dhe burrat
u nisën në luftë
gjithë dashuritë e pamundura
ishin aty
përzier me pluhurin e bardhë
të kohës
dëshirat brujteshin si ëndërrime
të shfaqura përgjysmë
në trajtë gruaje
ku krijohet parajsa e humbur
prej syve të të gjallëve
dhe thellë shikimve të burrave
fshihen dashuri
dhe linja fytyrash
që i pikonte agu
Kur ato gatuanin bukën e përditshme
dhe i faleshin Atit mashkull
që krijoi bukurinë dhe gruan
bukën dhe thikën
për t’i dhënë kuptim krijimit
në rrahjet e para të jetës
lutjen e gatuan prej dylli
dhe buke
një grua ndizte qiririn.
Poezia fituese e çmimit të dytë në konkursin poetik “Alternativa 2020”
