Cikël poetik nga Fatbardha Myslimaj Xhani

 

Nëse nuk rritem…

 

 

NE NUK E DIMË…

 

Ne nuk e dimë

Ç’ vjen pas një puthje

Pas një shtrëngimi

Ndoshta vjen vdekja e ëmbël…,

A ndoshta harrimi!

 

Ne nuk e dimë

Ç’ vjen pas fjalëve flakë

Të thëna mekur magji premtimi,

Ndoshta vdekje e ëmbël…,

A ndoshta harrimi!

 

Ne vërtet nuk e dimë

Ç’ do t’ ndodhë më pas

Me këtë prekje perëndie…,

Dridhje dëshirimi…

 

Ndoshta vdekja e ëmbël…,

A ndoshta harrimi…

 

 

 

DASHURIA  ËSHTË…

 

Dashuria është mënyra si më lëndon

Si më thua më pas më fal…

Mënyra se si ti më gëzon

Me një prekje të lehtë, me një fjalë.

 

Dashuria është mënyra, si më afron

Mënyra, se si ti më largon…

Edhe kur më mos të afrohesh

E di sërish, që je kaq pranë.

 

Dashuria është mënyra si më flet

Mënyra, si papritur ti hesht…

Edhe kur të mos flasësh

Zërin prapë unë e dëgjoj!

 

Dashuria është mënyra si ikën

Mënyra si, sërish ti vjen…

Dhe sikur më të mos kthehesh

Prapë me ty do të jem!

 

Dashuria është liria ime

Dhe qielli pafund, që s’ më mungon!

 

 

 

MË TRISHTON O MBRËMJE

 

Më trishton o mbrëmje

Më trishton  kur vjen

Më trishton  kur bie

Si ëndërr

Dashurie…

 

E s’ di si të të them

E s’ di si të të kem

 

E  di, s’ do  më besosh

Ëmbël nëpër fletë

Do më thuash lehtë

Ti s’ di të dashurosh…

 

A thua se s’ kam dritë

S’ kam dritë me të vërtetë

Që mbrëmjes së të shtunës

Nuk dita ti jap jetë…

 

Shoh hapa përmbi  gjethe

Ndjej tinguj nëpër erë

Një dorë tundet së largu

Pranverë…

Pranverë…

 

Dhe endem ëndrrandezur

Mbi qiej

Kthjelltësi

Me kupën mbushur yje

Me zemren

Arrati…

 

Më pret

E mbrëmja ndritet

S’ më flet

E dhembja

Rritet…

 

Më trishton  o mbrëmje

Më trishton kur vjen

Më trishton kur bie

Si ëndërr

Dashurie…

 

 

 

NËSE NUK RRITEM…

 

Nuk rritem dot nëse harroj

Gjithë çfarë një çast më nuk e kthen

Një pështjellim me njëmijë pse

Një bosh që ikën e më nuk vjen…

 

Nuk rritem dot nëse s’ kuptoj

Si ndizen zjarre në borë e shi

Në qiej mbushur plot me rrufe

Në njemijë rrugë për tek ti…

 

Nëse nuk rritem edhe harroj

Nese s’ kuptoj e nisem kot

Ti gjoksin hape bëje fole

Ta bëj liqen mbushur me lot.