Maskat ,

Plagët,

Borxhet,

Nuk i dua kurrë në sinorët e emrit tim.

Fjalën,

Përkëdheljen,

Kurorën e dasmës,

I dua lumturisht në harkun e një dite.

Gjethen,

Flladin,

Valën,

I bëj kurorë dhurate për miqtë e mi të mirë.

Ehos,

Piskamës

Vajatores,

Udhën ua kthej në theqafje alpine.

 

2.

Këngës,

Ujëvarës,

Stërkalave,

Ua jap të tërë kurmin tmerrësisht të lodhur.

Krojet,

Orteqet,

Ylberet,

I mireseardhoj në konakët e shpirtit engjëllor.

Dallgët,

arkëmortet,

Shiritat e zisë,

I mbaj si modelet e një bote të nxirosur.

Fëmijës,

femrës,

filizit,

Ia jap një busull që vrullimin e së ardhmes më tregojnë..

 

3.

Zotit,

Pasqyrës,

Flakës së zbehtë të qiririt,

Ua kam treguar në kuvendim përherë një të fshehtë.

Xhepat,

Trastat,

Kartëkreditet

Më mbetën si invalidë të një lufte pa krisma.

Verbëria,

Skamja,

mjegulla,

Ma hodhën vrik gjurin e gjoksin në tapet.

E shpresa,

E agu,

E udha,

Më dhanë një ditë fjalëkalimin për fitoren që s’e prisja.

Përtej këngëve

do të ketë një tingull të paprekur në buzë.

Përtej librave

Nuk e dua jo, harresën që të trishton.

Përtej dashurisë

Dua që të rilindë një puthje e prushtë.

Përtej syve të tu

Shoh dritëza yjesh jo nga ato që nw hone rrëzohen.

Përtej mureve të tu

Do të kacavirrem në kangjele edhe me thonj të gjakosur.

Mbase

Do ketë mbetur një kontinent pa u zbuluar.

Mbase

Do të ketë një rrugë e re me gurë të shkrumbuar.

Përtej dritareve

Vetmitar dua të shoh qirinjtë dritëndezur.

Jo,

Si ato qirinjtë që dritëzojnë fytyra vajzash në altar.

Ohhh,

mos më lini të dremis në timonin që është me hekur.

Mos më lini

të harroj për të dëgjuar plakun fjalëmentar.

Përtej dritës së dritës

Mbase do të zgjoj verbërinë e belbëzimin e burrit.

Mbase

Do të qetësoj ofshamat e invalidëve mbi karroca.

Më thoni

Ku, ku, ta gjej një Çelës të hedhur mes valëve të lumit.

Që nesër

të më duket më pak e dreqtë BOTA.