ATY JAM DIKU / Poezi nga Sabit Rrustemi

( RREMBI )

Rremb i kësaj luleje jam
në dorën tënde
për çdo mëngjes

Pa këtë pjesë të trupit tim
asnjë lule nuk sython
as çelë

Pa aromë mbetet jeta
e ti pa shkëlqim.

( NGA ATA SY )

I mblodhe ngjyrat që i dua
e i shkrove nëpër faqe
ato fusha të paprekshme
që ujiten prej një lumi

Sa herë mbetem në bregun tjetër
ti mërrolesh
nëpër re fshihesh

Unë gjej një shteg
përbiroj mes resh
e i lajë rrezet me një rigë shi

Nga ata sy
ngjyra të tjera shpërthejnë
breg më breg
përkohësisht na afrojnë.

( NË ATË DHOMË SHPIRTI )

Aty jam diku
i fshehur prej kohësh
në kornizë
brenda zemrës trëndafilore

Ajo as hapet
as mbyllet më shumë

Më mban në atë dhomë shpirti
përjetësisht.

( BULËZOJ E HAPEM )

Në ditën tënde të shenjtë
bulëzoj e hapem
faqesh ngjyra – ngjyra
mbi ballin që shëndritë
mbi të zezat flokë që flakërojnë
për jetë e mot.

( VARGU I PAPËRFUNDUAR )

Sa herë që perdja e zezë e ditës lëshohet
në zonën time kuqërreme kthehem
e të kërkoj përmes vargut të shpirtit

Një jetë si kjo më ikën
Sa hap e mbyll sytë

Vargu për ty mbetet i papërfunduar.